Mo vene Natale

Mo vene Natale

Mo vene Natale cu ‘o Maio a Baiano
e  ‘o juorno appriesso Santu Stefano
che ‘o purtammo a spasso p’ ‘e quartiere
tre vote all’anno sparanno ‘e fuoche ncielo.

‘A gente corre a s’abbraccià e a se vasà,

cu ‘e lacreme a l’uocchie
se canta e s’abballa int’ ‘o vuosco e p’ ‘o paese,
‘o munno è tutto rose e core.

Pure l’aucielle ncielo sò felice
e fanno mille gire ‘a ccà e a là.

‘A culochiatta chiamma ‘e figlie
e s’affacceno ‘a coppa a nu ramo ‘e noce
p’ ammirà  stu miraculo nterra.

Mparaviso se zompa e vola

comme ‘e cavallette mpazzite
vedenno chesta priezza ncopp’ ‘a terra.

Tu pienze ca mo esce ‘o sole,
torna l’azzurro dint’ ‘o core dâ gente,
ca ‘o  munno sta cagnanno.

Nisciuno se fa ncapa

chello ca succede ‘o juorno appriesso
quanno si sfraveca tutto ‘o custrutto!

Basta che a uno le tuocche na cosa,
‘o pizziche sulo cu na parola
ca te manna ô paese ‘e Pullecenella.

Pure n’amico ca sino a jere tu aje servito
se te po’ vuttà  int’ ‘o fuoco
nun ce penza doje vote
e arape ‘a porta d’ ‘o furno.

T’accuorge allora scunzulato
che mmiezo a stu bene ‘e Dio
ce stanno ‘e malate ‘e capa
che ietteno ‘e ciste chine ‘e cerase

ca ce aveno purtato ‘e pate
ncopp’ ê spalle cô scartiello.

(Baiano, 22 dicembre 2023)